Rusiya qüvvələrinin Ukraynanın paytaxtı Kiyevə gecə saatlarında həyata keçirdiyi genişmiqyaslı raket və PUA hücumu nəticəsində azı 15 nəfər ölüb, 33 nəfər yaralanıb.
Yenigun.Media xarici mediaya istinadən xəbər verir ki, hücum müharibənin başlanmasından bəri Kiyevə qarşı həyata keçirilən ən intensiv hava zərbələrindən biri olub.
Kiyev meri Vitali Kliçkonun sözlərinə görə, zərbələr nəticəsində yaşayış binaları, məktəb və uşaq tibb mərkəzi də daxil olmaqla çoxsaylı mülki obyektlərə ziyan dəyib.
Ukrayna Hərbi Hava Qüvvələri Rusiyanın hücum zamanı 168 PUA və müxtəlif tipli raketlərdən istifadə etdiyini açıqlayıb. Bildirilib ki, hava hücumundan müdafiə qüvvələri 46 qanadlı raketin 41-ni və 145 PUA-nı məhv edib. Lakin yüksək sürətli ballistik raketlərin heç birinin qarşısının alına bilmədiyi qeyd olunub.
Ölənlərin ən azı 8-i Kiyevin Solomyanski rayonunda qeydə alınıb. Çoxmərtəbəli yaşayış binasına zərbə nəticəsində binanın yuxarı mərtəbələrindəki mənzillər dağılıb.
Ukrayna Prezidenti Volodimir Zelenski hücumun uzun müddət hazırlandığını və Rusiya tərəfinin ballistik və qanadlı raketlərlə yanaşı, müxtəlif tipli PUA-lardan istifadə etdiyini bildirib.
Zelenski həmçinin Ukraynanın xüsusilə ballistik raketlərə qarşı müdafiə sistemlərinə ehtiyac duyduğunu vurğulayıb.
Kiyev vilayətinin Brovarı rayonunda da hücum nəticəsində bir nəfərin öldüyü, digər şəxsin yaralandığı açıqlanıb. Boryspil rayonunda isə anbarlara, o cümlədən Ukrayna Qırmızı Xaçına məxsus obyektə zərbə endirildiyi bildirilib.
Ukraynanın hava hücumundan müdafiə imkanlarının məhdud olması fonunda Rusiya və Ukrayna arasında uzaqmənzilli zərbələr son günlərdə daha da intensivləşib.
