ABŞ Prezidenti Donald Tramp Kanadadan idxal olunan mallara tətbiqi planlaşdırılan 50%-lik yeni gömrük tariflərinin qüvvəyə minməsini üç gün təxirə salıb.
Yenigun.Media xəbər verir ki, Tramp qərarı ABŞ və Kanada arasında razılaşma istiqamətində irəliləyiş əldə olunması ilə əsaslandırıb. Onun sözlərinə görə, tərəflər razılaşmaya yaxınlaşıb və yalnız sənədlərin yekunlaşdırılması qalır.
Kanadanın Baş naziri Mark Karni isə danışıqlarda ciddi irəliləyiş olduğunu, lakin yekun razılaşma üçün hələ görüləsi mühüm işlərin qaldığını bildirib.
ABŞ tərəfinin açıqlamasına əsasən, mümkün razılaşmada Amerika məhsullarının Kanada bazarına çıxışının genişləndirilməsi, iqtisadi təhlükəsizlik və rəqəmsal ticarətlə bağlı öhdəliklər yer ala bilər.
Tramp eyni zamanda uzun müddətdir mübahisə doğuran Keystone XL neft kəməri layihəsinin yenidən gündəmə gətirilə biləcəyini açıqlayıb. Layihə 2021-ci ildə ABŞ-ın keçmiş prezidenti Co Bayden tərəfindən dayandırılmışdı.
Yeni tariflərin tətbiqi Kanadanın meşə sənayesi, şərab və süd məhsulları sektorlarına ciddi zərbə vura, iş yerlərinin azalmasına və bəzi müəssisələrin fəaliyyətini dayandırmasına səbəb ola bilərdi.
ABŞ və Kanada arasında avtomobil ticarəti ilə bağlı tariflər də danışıqların əsas mövzularından biridir. Tərəflərin Kanada istehsalı avtomobillərə tətbiq olunan rüsumun 25%-dən 15%-ə endirilməsi variantını müzakirə etdiyi bildirilir.
Hazırda Vaşinqton və Ottava arasında danışıqlar davam edir. Üç günlük möhlətin tərəflərə yekun razılaşmanın şərtlərini müəyyənləşdirmək üçün əlavə vaxt qazandırdığı gözlənilir.
