2026-cı ilin yanvar-oktyabr aylarında Azərbaycanda emal sənayesində 18 milyard 995,1 milyon manat dəyərində məhsul istehsal edilib və sənaye xarakterli xidmətlər göstərilib.
Yenigun.Media xəbər verir ki, Dövlət Statistika Komitəsinin məlumatına əsasən, bu göstərici ötən ilin müvafiq dövrü ilə müqayisədə 2,7 faiz çoxdur.
Emal sənayesində ən yüksək artım avtomobil, qoşqu və yarımqoşquların istehsalında qeydə alınıb. Bu sahədə artım 77,2 faiz təşkil edib. Toxuculuq sənayesində 50,9 faiz, əczaçılıq məhsullarının istehsalında 47,4 faiz, tütün məmulatlarında isə 15,1 faiz artım müşahidə olunub.
Bununla yanaşı, qida məhsullarının istehsalı 5,4 faiz, tikinti materiallarının istehsalı 4,5 faiz artıb.
Qeyd edək ki, hesabat dövründə ölkədə ümumi sənaye istehsalının dəyəri 0,7 faiz azalıb. Qeyri-neft-qaz sənayesində isə 4,8 faizlik artım qeydə alınıb.
Bu göstəricilər emal və qeyri-neft sənayesinin ölkə iqtisadiyyatında rolunun artdığını göstərir.
