Azərbaycanın beynəlxalq nəqliyyat marşrutlarındakı rolunun genişlənməsi yükdaşımaların statistikasında da özünü göstərir. 2026-cı ilin ilk altı ayında ölkə ərazisindən nəqliyyat dəhlizləri üzrə 16 milyon 651 min ton yük keçirilib.
Yenigun.Media xəbər verir ki, bu barədə Milli Məclisin deputatı, iqtisadçı Vüqar Bayramov məlumat yayıb.
Məlumata görə, daşımaların əsas hissəsi dəmir yolu, avtomobil və dəniz nəqliyyatının payına düşüb. Belə ki, 7 milyon 587 min ton yük dəmir yolu, 5 milyon 699 min ton avtomobil, 3 milyon 365 min ton isə dəniz nəqliyyatı ilə daşınıb.
Dəhlizlər üzrə bölgüdə ən böyük göstərici Şərq-Qərb marşrutunda qeydə alınıb. Bu istiqamət üzrə daşımaların həcmi 9 milyon 207,4 min tona çatıb. Şimal-Cənub dəhlizində 4 milyon 559,3 min ton, Şimal-Qərb istiqamətində 2 milyon 623,3 min ton, Cənub-Qərb dəhlizində isə 261,8 min ton yük daşınıb.
Şərq-Qərb dəhlizinin tərkibində xüsusi əhəmiyyət daşıyan Avropa-Qafqaz-Asiya marşrutu üzrə göstərici 4 milyon 595 min ton təşkil edib.
Ümumilikdə, ilin ilk yarısında Azərbaycan üzərindən keçən yüklərin həcmində illik müqayisədə 3 faizlik artım qeydə alınıb. Şərq-Qərb dəhlizində isə artım daha yüksək olub və 10 faizə çatıb.
Bu dinamika Azərbaycanın yalnız tranzit ölkə kimi mövqeyini deyil, həm də regional logistika mərkəzi statusunu gücləndirir. Yük axınlarının artması nəqliyyat və logistika xidmətlərindən əldə olunan gəlirlərin genişlənməsi ilə yanaşı, ölkənin qeyri-neft sektorunda yeni iqtisadi imkanların formalaşmasına da şərait yaradır.
Vüqar Bayramovun qiymətləndirməsinə görə, Zəngəzur dəhlizinin və TRİPP layihəsinin fəaliyyətə başlaması Azərbaycanın üzərindən keçən yük axınının daha da böyüməsinə imkan verə bilər.
Bu baxımdan qarşıdakı mərhələdə Azərbaycanın əsas üstünlüyü onun müxtəlif beynəlxalq nəqliyyat istiqamətlərinin kəsişməsində yerləşməsi olacaq. Tranzit yük həcminin artması isə ölkənin valyuta gəlirlərinə və geoiqtisadi çəkisinə əlavə təsir göstərə bilər.
