Milli Məclisin deputatı Əli Məsimli Asiyada Qarşılıqlı Fəaliyyət və Etimad Tədbirləri üzrə Müşavirənin (AQEM) VII Zirvə Görüşünün əhəmiyyəti, Azərbaycanın beynəlxalq mövqeyi və regional əməkdaşlığın perspektivləri barədə Yenigun.Media-ya açıqlama verib.
Deputat bildirib ki, AQEM Asiyada sülhün, təhlükəsizliyin və sabitliyin təşviqinə, dövlətlər arasında etimadın artırılmasına və regional əməkdaşlığın genişləndirilməsinə xidmət edən mühüm beynəlxalq platformadır.
Əli Məsimlinin sözlərinə görə, oktyabrın 15-də Bakıda keçirilən AQEM-in VII Zirvə Görüşü Azərbaycanın beynəlxalq nüfuzunun gücləndirilməsi, üzv dövlətlərlə siyasi və iqtisadi əlaqələrin dərinləşdirilməsi, eləcə də ölkəmizin Avrasiya məkanında mühüm nəqliyyat-logistika qovşağı kimi mövqeyinin möhkəmləndirilməsi baxımından əhəmiyyət daşıyır.
Deputat qeyd edib ki, Azərbaycanın 2024–2026-cı illərdə AQEM-ə sədrliyi müddətində nəqliyyat, logistika, rəqəmsallaşma, ətraf mühitin mühafizəsi, turizm, təhsil və elm sahələrində əməkdaşlığın inkişafına xüsusi diqqət yetirilib. Bakı Zirvəsi bu istiqamətlər üzrə regional tərəfdaşlığın genişləndirilməsi üçün yeni imkanlar yaradıb.
Əli Məsimli vurğulayıb ki, Zirvə Görüşündə Prezident İlham Əliyevin çıxışı Azərbaycanın müstəqil xarici siyasət kursunun, regional təhlükəsizlik məsələlərinə yanaşmasının və beynəlxalq münasibətlərdə ədalət prinsipinə verdiyi önəmin ifadəsi olub.
Deputatın fikrincə, Azərbaycanın Avropa ilə Asiyanın kəsişməsində yerləşməsi ölkəmizin geosiyasi və geoiqtisadi əhəmiyyətini artırır. Ölkəmizin nəqliyyat, enerji, iqtisadiyyat və humanitar sahələrdə müxtəlif dövlətlərlə əməkdaşlığı regional əlaqələrin güclənməsinə və qarşılıqlı etimadın möhkəmlənməsinə xidmət edir.
Bakı Zirvəsinin yekununda qəbul edilən sənədlərə toxunan Əli Məsimli Bakı Bəyannaməsinin regional əməkdaşlıq, rəqəmsallaşma, təhlükəsizlik və dayanıqlı inkişaf baxımından əhəmiyyətini qeyd edib. Onun sözlərinə görə, nəqliyyat və rəqəmsal infrastrukturun inkişafı, xüsusilə Orta Dəhlizin imkanlarından səmərəli istifadə edilməsi Asiya ilə Avropa arasında iqtisadi əlaqələrin genişləndirilməsinə töhfə verə bilər.
Deputat hesab edir ki, AQEM çərçivəsində əməkdaşlığın gücləndirilməsi Azərbaycanın beynəlxalq tərəfdaşlıqlarının genişləndirilməsi ilə yanaşı, regionda davamlı sülhün və sabitliyin təmin olunması baxımından da mühüm perspektivlər açır.
Əli Məsimlinin qənaətinə görə, Bakı Zirvəsi Azərbaycanın regional və beynəlxalq əməkdaşlıq təşəbbüslərinin təşviqi, ölkəmizin tranzit potensialının artırılması və Asiya dövlətləri ilə praktiki tərəfdaşlığın dərinləşdirilməsi baxımından mühüm əhəmiyyətə malikdir.
Yenigun.Media
